کراچی (نمائندہ خصوصی) – لانڈھی ٹاؤن انتظامیہ نے سرکاری اراضی، دفاتر اور پارکوں پر قبضہ کرنے والے عناصر کے خلاف سخت ایکشن لینے کا اعلان کر دیا ہے۔ باوثوق ذرائع کے مطابق، ٹاؤن انتظامیہ جلد ہی عدالت میں پٹیشن دائر کرے گی جس میں نہ صرف قبضہ مافیا بلکہ ان کے سرکاری و سیاسی سہولت کاروں کے نام بھی شامل ہوں گے۔
✅ سرکاری املاک پر منظم قبضے کی سازش بے نقاب
ذرائع کے مطابق لانڈھی ٹاؤن کے کئی اہم مقامات پر قبضہ مافیا متحرک ہو چکی ہے، جن میں شامل ہیں:
- سابقہ یو سی 6 آفس، نزد مونو ٹیکنیکل انسٹیٹیوٹ، 12000 مین روڈ، لانڈھی
- لانڈھی ٹاؤن کا پرانا ہائیڈرینٹ، 36 بی، زمان آباد، 15000 روڈ
- ٹاؤن اسٹور یارڈ، نزد الرازی میڈیکل سینٹر، لانڈھی 3
- کورنگی 5 اسٹیڈیم
- سابقہ نرسری، نزد سابقہ یو سی 20 آفس، ایم شریف روڈ
یہ تمام مقامات اس وقت قبضہ مافیا کے نشانے پر ہیں، جنہیں بعض بااثر افراد، بشمول کے ایم سی، ایس بی سی اے، کے ڈی اے اور لانڈھی تھانے کے ذمہ داران کی پشت پناہی حاصل ہے۔
✅ قبضہ مافیا کے خلاف مکمل جنگ کا اعلان
ٹاؤن انتظامیہ نے واضح کیا ہے کہ وہ کسی بھی صورت میں سرکاری اراضی پر قبضہ برداشت نہیں کرے گی۔ ٹاؤن چیئرمین نے تمام یو سی چیئرمینز کو ہدایت دی ہے کہ وہ اپنی اپنی یوسیز میں سرکاری اراضی پر ہونے والے یا ممکنہ قبضوں کی تفصیلی رپورٹ فوری طور پر جمع کروائیں۔
ساتھ ہی محکمہ انکروچمنٹ کو کسی بھی شکایت پر فوری کارروائی کی سخت ہدایات جاری کر دی گئی ہیں تاکہ قبضہ مافیا کی ہر کوشش کو موقع پر ہی ناکام بنایا جا سکے۔