کراچی :(رپورٹ: فاروق احمد)منگھوپیر ٹاؤن میں 14 اگست کے موقع پر جشنِ آزادی کی تقریبات قومی جوش و جذبے کے ساتھ شروع ہو گئیں۔ اس موقع پر چیئرمین منگھوپیر ٹاؤن حاجی نواز علی بروہی کی قیادت میں ایک عظیم الشان “معرکۂ حق” ریلی نکالی گئی جس میں ٹاؤن افسران، خواتین و مرد کونسلرز اور شہریوں کی بڑی تعداد نے بھرپور شرکت کی۔
ریلی کا آغاز منگھوپیر ٹاؤن آفس سے ہوا جو اہم شاہراہوں اور مرکزی بازاروں سے گزرتی ہوئی محبتِ وطن کے عظیم مظاہرے میں بدل گئی۔ شرکاء نے قومی پرچم تھام رکھے تھے اور ان کے “پاکستان زندہ باد” کے فلک شگاف نعرے فضا میں گونجتے رہے۔
اس موقع پر منگھوپیر کی گلیوں، بازاروں اور عمارتوں کو سبز و سفید پرچموں سے سجا دیا گیا۔ چیئرمین حاجی نواز علی بروہی نے خود مختلف علاقوں کا دورہ کیا، عوام کے ساتھ جھنڈے لگائے اور جشن میں براہِ راست شرکت کی۔
تقریب سے خطاب کرتے ہوئے چیئرمین بروہی نے کہا:
“14 اگست قربانیوں، خودداری اور اسلامی تشخص کی علامت ہے۔ یہ دن صرف جشن کا نہیں بلکہ اس عہد کی تجدید کا دن ہے کہ ہم متحد ہو کر اپنے وطن کو ترقی و خوشحالی کی راہ پر گامزن کریں گے۔”
ریلی کا اختتام اجتماعی دعا، نعرۂ تکبیر اور اس عزم کے ساتھ ہوا کہ پاکستان کی ترقی، امن اور استحکام کے لیے ہر شہری اپنا مثبت کردار ادا کرے گا۔