💥 خیرپور: عوام کے پیسوں سے افسران کی عیش و عشرت؟ ضلع کونسل کے بجٹ سے فارم ہاؤس کی پرتعیش تعمیر کا انکشاف

خیرپور (خصوصی رپورٹ) – ضلع کونسل خیرپور کے چیف میونسپل آفیسر یوسف شیخ کی جانب سے چُنا سمنگ گاؤں کے قریب عوامی بجٹ یعنی ضلع کونسل کے فنڈز سے کروڑوں روپے کی لاگت سے عیش و عشرت سے بھرپور فارم ہاؤس تعمیر کیا جا رہا ہے۔ معتبر ذرائع کے مطابق فارم ہاؤس میں انڈر گراؤنڈ سوئمنگ پول، اوپن پول، اور لگژری کمروں کی تعمیر جاری ہے، جہاں اعلیٰ افسران اور بیوروکریسی کی اشرافیہ اپنی زندگی کو "انجوائے" کریں گے۔

💬 عوامی ردعمل:

عوامی حلقوں میں سخت ردعمل دیکھنے میں آ رہا ہے۔ سوشل میڈیا پر صارفین نے سوال اٹھایا ہے کہ:

"جب عوام پینے کے صاف پانی، صحت، تعلیم، اور روزگار جیسی بنیادی سہولیات سے محروم ہیں تو یہ فارم ہاؤس کس کے لیے ہے؟"

یہ حقیقت باعثِ افسوس ہے کہ عوام مہنگائی، بے روزگاری، اور بنیادی سہولیات کے فقدان کا شکار ہیں جبکہ سرکاری عہدوں پر بیٹھے افراد عوام کے پیسوں سے ذاتی عیش و عشرت کی عمارتیں کھڑی کر رہے ہیں۔

📣 عوامی مطالبہ:

شہریوں نے وزیراعلیٰ سندھ، نیب، اور دیگر احتسابی اداروں سے مطالبہ کیا ہے کہ وہ اس معاملے کا فوری نوٹس لیں، تحقیقات کریں اور ذمہ دار افراد کو قانون کے کٹہرے میں لایا جائے۔