کراچی، 31 جولائی 2025 – نیو کراچی ٹاؤن انتظامیہ کی جانب سے بلدیاتی اسکولوں کے اساتذہ کی پیشہ ورانہ تربیت اور تدریسی صلاحیتوں کو فروغ دینے کے لیے ایک روزہ تربیتی سیمنار بعنوان "علم و تربیت" کا کامیاب انعقاد کیا گیا۔ اس خصوصی نشست میں نیو کراچی ٹاؤن کے چیئرمین محمد یوسف نے بطور مہمانِ خصوصی شرکت کی، جبکہ میونسپل کمشنر ایاز حمید اللہ بلوچ، وائس چیئرمین شعیب بن ظہیر، ڈائریکٹر ایجوکیشن سید محمد مزمل عباسی اور دیگر معززین بھی موجود تھے۔
اس تربیتی سیمنار کا مقصد اساتذہ کو جدید تدریسی طریقہ کار، مؤثر کلاس روم مینجمنٹ، اور طلبہ کی ذہنی و اخلاقی تربیت کے جدید تقاضوں سے ہم آہنگ کرنا تھا۔ سیمنار میں نیو کراچی کے مختلف بلدیاتی اسکولوں کے درجنوں اساتذہ نے شرکت کی اور ماہرینِ تعلیم سے استفادہ حاصل کیا۔
تقریب سے خطاب کرتے ہوئے چیئرمین محمد یوسف نے کہا:
"ہماری کوشش ہے کہ بلدیاتی سطح پر موجود تعلیمی اداروں کا معیار بلند ہو۔ اساتذہ کو جدید رجحانات سے آگاہ کرنا ہمارے تعلیمی نظام کی بہتری کے لیے ناگزیر ہے۔ بہتر تدریس ہی بہتر معاشرے کی بنیاد ہے۔"
میونسپل کمشنر ایاز حمید اللہ بلوچ نے سیمنار سے خطاب میں کہا:
"اساتذہ قوم کے معمار ہیں، ان کی تربیت دراصل معاشرے کی تربیت ہے۔ ہم ایسے تربیتی پروگرامز کے تسلسل کو جاری رکھیں گے تاکہ اساتذہ اپنی پیشہ ورانہ صلاحیتوں میں مزید نکھار لا سکیں۔"
تقریب کے دیگر مہمانان میں شامل تھے:
🔹 چیئرمین اسٹینڈنگ کمیٹی برائے تعلیم عمران فقیر
🔹 کمیٹی ممبران: شگفتہ انیس، نصرت مسعود، صاصبہ طلعت عمران
🔹 وائس چیئرمین یوسی 11: عمران شفیق
🔹 ڈائریکٹر ایڈمن: شمونہ صدف
🔹 ڈائریکٹر سینی ٹیشن: مشتاق احمد خان
سیمنار کے دوران اساتذہ کو تخلیقی تدریسی سرگرمیوں، مؤثر ابلاغ، طلبہ کی انفرادی سیکھنے کی رفتار کو سمجھنے، اور کلاس روم مینجمنٹ کے حوالے سے عملی مشورے فراہم کیے گئے۔
تقریب کے شرکاء نے نیو کراچی ٹاؤن انتظامیہ کو خراجِ تحسین پیش کیا اور اس امید کا اظہار کیا کہ آئندہ بھی ایسے اقدامات جاری رہیں گے جو بلدیاتی سطح پر تعلیمی نظام کو مزید مضبوط اور مؤثر بنائیں گے۔