کراچی (اسٹاف رپورٹر) — یومِ آزادی کے موقع پر وزیراعلیٰ سندھ سید مراد علی شاہ نے مزارِ قائد کا دورہ کیا، جہاں انہوں نے پاکستان ڈاؤن سنڈروم ایسوسی ایشن (PDSA) گلستانِ جوہر یونٹ کے زیر تربیت بچوں سے ملاقات کی۔ اس یادگار لمحے میں وزیراعلیٰ نے نہ صرف بچوں کو آزادی کی مبارکباد دی بلکہ ان کے حوصلے بلند کرنے کے لیے محبت اور شفقت کے کلمات بھی ادا کیے۔
وزیراعلیٰ نے خصوصی طور پر عمر نامی بچے سے ملاقات کی، اس کی باتیں غور سے سنیں اور اس کی صلاحیتوں کی تعریف کی۔ اس موقع پر وزیراعلیٰ نے کہا کہ حکومتِ سندھ خصوصی بچوں کے لیے معیاری تعلیمی ادارے، فنی تربیت اور روزگار کے مواقع فراہم کرنے کے لیے پرعزم ہے، تاکہ وہ معاشرے کے فعال اور بااعتماد فرد کے طور پر ابھر سکیں۔
ملاقات کے دوران PDSA کے عہدیداران نے وزیراعلیٰ کو ادارے کی سرگرمیوں، تربیتی پروگرامز اور خصوصی بچوں کی کامیابیوں سے آگاہ کیا۔ وزیراعلیٰ نے ادارے کی کاوشوں کو سراہتے ہوئے کہا کہ حکومت ایسے اقدامات میں مکمل تعاون کرے گی جو خصوصی افراد کی فلاح و بہبود کے لیے ہوں۔
مزارِ قائد پر یہ ملاقات نہ صرف بچوں کے لیے خوشی کا باعث بنی بلکہ اس نے ایک مثبت پیغام بھی دیا کہ آزادی کا اصل جشن تب مکمل ہوتا ہے جب معاشرے کے ہر فرد کو برابر کا حق، عزت اور موقع ملے۔ وزیراعلیٰ کی اس اقدام نے واضح کیا کہ خصوصی بچوں کی شمولیت اور خوشحالی، ایک مضبوط اور ترقی یافتہ پاکستان کی بنیاد ہے۔