اسلام کوٹ (نامہ نگار، پیپلز ٹی وی پاکستان) — تھر کول ایریا کے عوامی مسائل کے حل کے لیے صوبائی وزیر سید ناصر حسین شاہ کی زیر صدارت کھلی کچہری تھر لارج اسلام کوٹ میں منعقد ہوئی۔ اجلاس میں ضلعی و مقامی انتظامیہ، کمپنی کے نمائندے اور علاقے کے معززین شریک ہوئے، مگر افسوس کہ مقامی افراد کو اپنے مسائل حکام کے سامنے پیش کرنے کا موقع نہیں دیا گیا، جس پر شرکاء میں مایوسی پھیل گئی۔
اس موقع پر نامور مقامی صحافی اعجاز بجیر نے جرات مندی سے عوامی نمائندگی کی اور ان مسائل کو اجاگر کیا جو برسوں سے نظر انداز ہوتے آئے ہیں۔ اعجاز بجیر کی تقریر کی ویڈیوز بھی سوشل میڈیا پر سامنے آئیں، جن میں وہ منتخب نمائندوں اور کمپنیوں کے رویے پر سخت تنقید کرتے دکھائی دیتے ہیں۔
انہوں نے کہا کہ افسوس کی بات ہے کہ ہمارے نمائندے، جو عوام کے ووٹوں سے ایوانوں میں پہنچتے ہیں، انہی عوام کو نظر انداز کر دیتے ہیں اور نجی کمپنیوں کو فوقیت دیتے ہیں۔ ان کا کہنا تھا کہ چاہے کوئی سمجھوتہ کرے یا نہ کرے، وہ ہر فورم پر تھر کے عوام کا مقدمہ لڑیں گے اور ان کے حق میں آواز بلند کرتے رہیں گے۔
اعجاز بجیر کے مؤقف کو عوامی حلقوں میں بھرپور پذیرائی ملی اور یہ مطالبہ شدت اختیار کر گیا ہے کہ آئندہ اس نوعیت کی کچہریوں میں مقامی افراد کو کھل کر بولنے اور اپنے مسائل براہ راست حکام تک پہنچانے کا پورا موقع دیا جائے۔ عوامی نمائندگی کا اصل مقصد ہی یہی ہے کہ عوام کی بات ان تک پہنچے جو فیصلے کرنے کے اختیار رکھتے ہیں۔