پی ایس کیو سی اے ہیڈکوارٹر کراچی میں اجلاس — ڈی جی ڈاکٹر سیدہ ضیاء بتول کا ناقص مصنوعات کے خلاف زیرو ٹالرنس کا اعلان
پاکستان اسٹینڈرڈز اینڈ کوالٹی کنٹرول اتھارٹی (PSQCA) کی ڈائریکٹر جنرل ڈاکٹر سیدہ ضیاء بتول کی زیرِ صدارت پی ایس کیو سی اے ہیڈ آفس کراچی میں ایک اہم اجلاس منعقد ہوا۔ اجلاس میں ملک بھر میں معیار کے فروغ اور مارکیٹ میں دستیاب مصنوعات کے معیار کو بہتر بنانے کے لیے کیے گئے اقدامات کا تفصیلی جائزہ لیا گیا۔
سیکریٹری پی ایس کیو سی اے اے کے رند، متعلقہ ڈائریکٹرز اور تمام ڈائریکٹوریٹس کے نمائندگان نے اجلاس میں شرکت کی۔ ڈی جی نے مختلف شعبہ جات کا معائنہ کیا اور ملازمین سے تکنیکی پیش رفت اور موجودہ سرگرمیوں پر بریفنگ لی۔
انہوں نے زور دیا کہ عوام کا تحفظ اولین ترجیح ہے، اور ناقص مصنوعات کے لیے مارکیٹ میں کسی قسم کی گنجائش نہیں ہوگی۔ ڈی جی نے واضح ہدایت دی کہ مارکیٹ سرویلنس، انسپکشن، اور انفورسمنٹ سرگرمیوں میں تیزی لائی جائے۔
انہوں نے صنعتی شعبے کے ساتھ تعاون کو فروغ دینے، لازمی معیارات کے نفاذ کو یقینی بنانے، اور بین الاقوامی بہترین طریقہ کار کے مطابق نئے معیارات کی تیاری کی رفتار بڑھانے کی تاکید کی۔
آخر میں ڈاکٹر سیدہ ضیاء بتول نے اس عزم کا اظہار کیا کہ ادارے کی ٹیسٹنگ، انسپکشن، اور سرٹیفکیشن صلاحیتوں کو مضبوط بنایا جائے گا تاکہ پی ایس کیو سی اے پاکستان میں معیار و معیارات کی حقیقی نگہبان ثابت ہو۔