قونصلیٹ جنرل آف پاکستان، دبئی — پریس ریلیز
دبئی میں پاکستان کے قونصل جنرل جناب حسین محمد نے آج شارجہ ایکسپو سینٹر میں منعقدہ 44ویں شارجہ انٹرنیشنل بک فیئر 2025 میں پاکستان پویلین کا افتتاح کیا۔ ہال نمبر 6 – اسٹینڈ N1 میں قائم پاکستان پویلین ملک کے بھرپور ادبی ورثے اور اشاعتی ثقافت کی نمائندگی کرتا ہے۔
پاکستان کے معروف پبلشرز، جن میں قدرت اللہ پبلیکیشنز — جو قرآنِ کریم کی معیاری اشاعتوں کے لیے مشہور ہے — ضیاء القرآن پبلیکیشنز، اور پیرا ماؤنٹ بکس شامل ہیں، اس سال کے عالمی شہرت یافتہ ادبی میلے میں پاکستان کی بھرپور نمائندگی کر رہے ہیں۔
قونصل جنرل نے اس موقع پر پاکستانی پبلشرز کی شرکت کو سراہتے ہوئے کہا کہ شارجہ انٹرنیشنل بک فیئر جیسے عالمی پلیٹ فارمز پاکستان کی ادبی روایات، ثقافتی اقدار اور تخلیقی صلاحیتوں کو دنیا کے سامنے اجاگر کرنے کا بہترین ذریعہ ہیں۔
جناب حسین محمد نے شارجہ کے حکمران عزت مآب شیخ ڈاکٹر سلطان بن محمد القاسمی کی فنون، ثقافت اور علم کے فروغ کے لیے گراں قدر خدمات کو خراجِ تحسین پیش کیا۔ انہوں نے عرب امارات کے دیگر سرکاری پویلینز، جیسے مملکتِ سعودی عرب، سلطنتِ عمان، حکومتِ شارجہ، اور ابو ظہبی کے پویلینز کا دورہ بھی کیا۔
انہوں نے اردو ورلڈ بکس کے سربراہ سرمد خان کی کاوشوں کو بھی سراہا، جنہوں نے پاکستانی ادب اور مطبوعات کو فروغ دینے کے لیے خصوصی اسٹال قائم کیا۔ انہوں نے پاکستانی کمیونٹی کے اراکین پر زور دیا کہ وہ پاکستان پویلین کا دورہ کریں اور وہاں موجود ادبی شاہکاروں سے لطف اندوز ہوں۔
قونصلیٹ جنرل آف پاکستان — دبئی