کراچی: ماڑی پور ٹاؤن کے چیئرمین ہمایوں محمد خان نے یوسی 6 محمدی کالونی میں واقع جامع مسجد اصحابِ صفاء کے اطراف جاری صفائی ستھرائی، مین ہول کے ڈھکنوں کی تنصیب اور نالوں کی صفائی کے کاموں کا تفصیلی جائزہ لیا۔ اس موقع پر انہوں نے فوری طور پر جراثیم کش چونے کے چھڑکاؤ کی ہدایت بھی جاری کی۔
دورے کے موقع پر میونسپل کمشنر جاوید قمر، ٹاؤن کے متعلقہ افسران اور یوسی وائس چیئرمین محمد حسن بھی چیئرمین کے ہمراہ موجود تھے۔
اس موقع پر گفتگو کرتے ہوئے ٹاؤن چیئرمین ہمایوں محمد خان نے کہا:
"ہم ماڑی پور ٹاؤن کے عوام کی خدمت بلا رنگ و نسل اور بلا تفریق کر رہے ہیں، چاہے ان کا تعلق کسی بھی فرقے، مذہب یا سیاسی جماعت سے ہو، ہم سب کو ایک ہی نگاہ سے دیکھتے ہیں۔"
انہوں نے مزید کہا:
"میری بھرپور کوشش ہے کہ محدود وسائل کے باوجود ماڑی پور کے عوام کو تمام بنیادی بلدیاتی سہولیات فراہم کی جائیں تاکہ ان کے روزمرہ معمولات میں کسی قسم کی رکاوٹ پیش نہ آئے، یہ میرے لوگ ہیں اور ان کی خوشی ہی میری خوشی ہے۔"
علاقے کے مکینوں اور بالخصوص جامع مسجد اصحابِ صفاء کے منتظمین نے چیئرمین ہمایوں محمد خان کی خدمات کو سراہتے ہوئے کہا کہ ان کی یہ خوش قسمتی ہے کہ انہیں ایسا چیئرمین ملا ہے جو عوامی مسائل کو اپنا مسئلہ سمجھتا ہے اور ہر اچھے برے موقع پر خود عوام کے درمیان موجود رہ کر مسائل کو موقع پر حل کرتا ہے۔
علاقہ مکینوں نے اس امید کا اظہار کیا کہ ماڑی پور ٹاؤن میں صفائی ستھرائی اور دیگر بلدیاتی سہولیات کی فراہمی کا یہ سلسلہ اسی جذبے اور رفتار کے ساتھ جاری رہے گا۔