کراچی، ۲۸ جنوری ۲۰۲۶
ٹاؤن میونسپل کارپوریشن منگھوپیر – محکمہ اطلاعات و تعلقاتِ عامہ (پریس ریلیز)
میئر کراچی بیرسٹر مرتضیٰ وہاب اور چیئرمین منگھوپیر ٹاؤن حاجی نواز علی بروہی نے حب ریزروائر کا تفصیلی دورہ کیا، جہاں حب ریزروائر کی بحالی اور کراچی کو پانی کی فراہمی میں اضافے کے منصوبے کو ایک تاریخی اور عوامی فلاح کا بڑا اقدام قرار دیا گیا۔
اس موقع پر بتایا گیا کہ یہ وہ منصوبہ ہے جسے گزشتہ چالیس برسوں تک مسلسل نظر انداز کیا گیا، جس کے باعث منگھوپیر، اورنگی، مومن آباد اور ملحقہ علاقوں کے عوام کو شدید پانی کی قلت کا سامنا رہا۔
دیرینہ مسئلے کا عملی حل، قیادت موقع پر موجود
چیئرمین منگھوپیر ٹاؤن حاجی نواز علی بروہی نے کہا کہ آج میئر کراچی بیرسٹر مرتضیٰ وہاب کی قیادت میں ان دیرینہ مسائل کو عملی طور پر حل کیا جا رہا ہے اور موقع پر موجود ہو کر ترقیاتی کاموں کی نگرانی اس بات کا واضح ثبوت ہے کہ پیپلز پارٹی محض دعووں پر نہیں بلکہ عملی خدمت پر یقین رکھتی ہے۔
انہوں نے بتایا کہ حب ریزروائر کی مجموعی 15 ایم جی ڈی گنجائش میں شامل ساڑھے سات، ساڑھے سات ایم جی ڈی کے دونوں ٹینک گزشتہ کئی دہائیوں سے مٹی اور گدلے پن کے باعث اپنی اصل صلاحیت کھو چکے تھے، جس کا براہِ راست اثر کراچی کے مغربی علاقوں بالخصوص منگھوپیر ٹاؤن پر پڑ رہا تھا۔
“میئر کراچی کی خود نگرانی اس بات کا ثبوت ہے کہ پیپلز پارٹی عملی خدمت اور عوامی مسائل کے حل پر یقین رکھتی ہے۔”
— حاجی نواز علی بروہی
رمضان سے قبل بحالی، لاکھوں افراد مستفید ہوں گے
حاجی نواز علی بروہی نے اس عزم کا اظہار کیا کہ رمضان المبارک سے قبل حب ریزروائرز کی مکمل صفائی اور بحالی کا عمل مکمل کر لیا جائے گا تاکہ عوام کو پانی کی بہتر، مستقل اور باوقار فراہمی ممکن بنائی جا سکے۔
انہوں نے مزید کہا کہ اس منصوبے سے مومن آباد، اورنگی، منگھوپیر، بلدیہ ٹاؤن، ماڑی پور اور ڈسٹرکٹ سینٹرل کے متعدد علاقے براہِ راست مستفید ہوں گے اور برسوں بعد عوام کو پانی کے مسئلے سے حقیقی ریلیف ملے گا۔
ماضی کی غفلت، موجودہ قیادت کا عوامی وژن
انہوں نے ماضی کی صورتحال پر افسوس کا اظہار کرتے ہوئے کہا کہ شہر بنانے کے دعوے تو بہت کیے گئے، مگر ایسے بنیادی اور عوامی فلاح کے منصوبوں پر کبھی توجہ نہیں دی گئی، جبکہ پیپلز پارٹی کی قیادت بلا تفریق خدمت کے وژن کے تحت ان علاقوں میں بھی کام کر رہی ہے جہاں ماضی میں ترقیاتی کام نہیں ہوئے۔
“پانی جیسے بنیادی مسئلے پر سیاست نہیں، عملی اقدامات ہی ہماری ترجیح ہیں۔”
— بیرسٹر مرتضیٰ وہاب
کراچی کے لیے ناگزیر منصوبہ
اس موقع پر میئر کراچی بیرسٹر مرتضیٰ وہاب نے کہا کہ حب ریزروائر اور حب کینال کی بحالی کراچی کے لیے ناگزیر تھی اور اس منصوبے کو طویل عرصے تک نظر انداز کرنا شہر کے ساتھ ناانصافی کے مترادف تھا۔
انہوں نے زور دیا کہ پیپلز پارٹی کی حکومت اور بلدیاتی ادارے باہمی اشتراک سے کراچی کے مسائل حل کرنے کے لیے سنجیدگی سے کام کر رہے ہیں اور حب ریزروائر کی بحالی اسی عزم کی واضح مثال ہے، جس کے مثبت نتائج بہت جلد عوام کے سامنے آئیں گے۔