کراچی (اسٹاف رپورٹر)
الخدمت فاؤنڈیشن سندھ کے زیرِ اہتمام فری آئی ٹی ٹریننگ پروگرام بنوقابل کی افتتاحی تقریب حیدرآباد میں منعقد ہوئی، جس میں تعلیمی، سماجی اور تنظیمی شخصیات نے بھرپور شرکت کی۔ اس پروگرام کا بنیادی مقصد نوجوانوں کو جدید آئی ٹی مہارتوں سے آراستہ کر کے انہیں باعزت روزگار اور خود انحصاری کی راہ پر گامزن کرنا ہے۔
تقریب سے خطاب کرتے ہوئے نائب صدر الخدمت فاؤنڈیشن سندھ انجینئر عمر فاروق نے کہا کہ بنوقابل پروگرام نوجوان نسل کے لیے امید کی ایک نئی کرن ہے، جو انہیں تعلیم اور ہنر کے ذریعے روشن مستقبل فراہم کرے گا۔
“الخدمت فاؤنڈیشن ملک بھر میں ڈیجیٹل اسکلز کے فروغ کے لیے سنجیدہ اقدامات کر رہی ہے، اور حیدرآباد، جامشورو اور قرب و جوار کے علاقوں سے تعلق رکھنے والے نوجوان بچے اور بچیاں اس پروگرام سے بھرپور فائدہ اٹھا سکتے ہیں۔”
— انجینئر عمر فاروق
اس موقع پر سرپرست الخدمت فاؤنڈیشن ضلع حیدرآباد انجینئر حافظ طاہر مجید نے کہا کہ بنوقابل پروگرام نہ صرف بے روزگاری کے مسئلے کے حل میں مددگار ثابت ہوگا بلکہ حیدرآباد کے نوجوانوں کو قومی اور بین الاقوامی سطح پر آگے بڑھنے کے مواقع بھی فراہم کرے گا۔
تقریب میں ضلعی صدر نعیم عباسی، جنرل سیکرٹری سلیم خان، سابق وائس چانسلر جی سی یونیورسٹی ناصر شیخ، جی سی یونیورسٹی المنائی کے صدر ڈاکٹر اشفاق قریشی، گسٹا کے ڈویژنل صدر محمود چوہان اور تنظیم اساتذہ کے پروفیسر رئیس منصوری سمیت دیگر سماجی و تعلیمی شخصیات نے بھی خطاب کیا اور پروگرام کو خوش آئند قرار دیا۔
مقررین نے اس عزم کا اظہار کیا کہ بنوقابل پروگرام کے ذریعے نوجوانوں کو فری آئی ٹی کورسز، عملی تربیت اور مستقبل میں روزگار سے جوڑنے کے مواقع فراہم کیے جائیں گے، تاکہ وہ ڈیجیٹل پاکستان کی تعمیر میں مؤثر کردار ادا کر سکیں۔
واضح رہے کہ اب تک ملک بھر میں 75 ہزار سے زائد افراد بنوقابل پروگرام کے تحت فری آئی ٹی ٹریننگ حاصل کر چکے ہیں، جبکہ ایک لاکھ سے زائد نوجوان اس وقت مختلف آئی ٹی کورسز میں زیرِ تربیت ہیں۔