پشاور میں 20 کلو مکس آٹا 2500 جبکہ فائن آٹا 2700 روپے تک پہنچ گیا
(ویب ڈیسک) پشاور میں آٹے کی قیمتوں میں ایک بار پھر اضافہ دیکھنے میں آیا ہے، جس سے پہلے ہی مہنگائی سے پریشان شہریوں کی مشکلات میں مزید اضافہ ہو گیا ہے۔
آٹا ڈیلرز ایسوسی ایشن کے مطابق مکس آٹے کا 20 کلو تھیلا 2400 روپے سے بڑھ کر 2500 روپے ہو گیا ہے، جبکہ فائن آٹے کا 20 کلو تھیلا 2600 روپے سے بڑھ کر 2700 روپے میں فروخت ہو رہا ہے۔
ایسوسی ایشن کا کہنا ہے کہ آٹے کی طلب میں اضافہ اور سپلائی میں اتار چڑھاؤ قیمتوں میں اضافے کی بنیادی وجہ ہے۔
ماہرین کے مطابق رمضان المبارک کے قریب آٹے کی قیمتوں میں اتار چڑھاؤ معمول کی بات ہے، تاہم مسلسل اضافہ شہریوں کی جیب پر اضافی بوجھ ڈال رہا ہے۔
“رمضان سے قبل اشیائے خورونوش کی قیمتوں میں اضافہ عام رجحان ہے، لیکن مسلسل بڑھتی ہوئی مہنگائی عوام کیلئے شدید پریشانی کا باعث بن رہی ہے۔”
شہریوں نے حکومت سے مطالبہ کیا ہے کہ قیمتوں کو کنٹرول میں رکھنے کیلئے فوری اور مؤثر اقدامات کیے جائیں تاکہ عام آدمی کو مزید مشکلات کا سامنا نہ کرنا پڑے۔
واضح رہے کہ رمضان المبارک سے قبل پشاور، لاہور، کراچی اور دیگر بڑے شہروں میں بھی آٹے کی قیمتوں میں اضافہ ریکارڈ کیا گیا تھا۔