اٹلی پہلی بار سندھی ثقافت کے رنگوں میں رنگ گیا — پالرمو میں شاندار ثقافتی پروگرام
پبلشر:
پالرمو، اٹلی — اٹلی میں پہلی مرتبہ سندھی ثقافت کے حوالے سے ایک شاندار ثقافتی پروگرام کا انعقاد کیا گیا، جس نے پالرمو شہر کو سندھی رنگوں میں رنگ دیا۔ اس تقریب کا اہتمام اٹلی میں مقیم سندھی طلبہ نے کیا جبکہ کرائینیا اور میسینا کے سندھی طلبہ نے بھرپور شرکت کی۔
پروگرام میں روایتی سندھی گیتوں پر رقص، لوک دھنیں، اور سندھ کی تہذیب و تمدن پر معلوماتی سیشن پیش کیے گئے۔ شرکاء کو سندھ کے تاریخی ورثے، ثقافتی روایات اور زبان کے حوالے سے آگاہ کیا گیا۔
تقریب کے مہمانِ خصوصی اٹلی کے نامور مورخ تھے، جنہوں نے کہا: “سندھی قوم اپنی زبان، موسیقی اور روایتوں کے ذریعے عالمی ثقافت میں منفرد مقام رکھتی ہے۔”
"ہم دنیا کے کسی بھی کونے میں جا کر بس جائیں، مگر اپنی دھرتی، زبان اور ثقافت سے محبت ہمیشہ ہمارے دلوں میں زندہ رہے گی۔" — سہیل احمد (سندھی طالبعلم)
اس موقع پر سندھی طلبہ سہیل احمد، سرائی پیارو خاصخیلی، علی بخش اور دیگر نے خطاب کیا، شاعری پیش کی اور سندھ کے ساتھ اپنی وابستگی کا اظہار کیا۔ شرکا نے زور دیا کہ بیرونِ ملک مقیم نوجوان اپنی ثقافت کو مختصر تقریبات، تربیتی نشستوں اور آن لائن چینلز کے ذریعے برقرار رکھیں۔
تقریب کے منتظمین نے کہا کہ آئندہ ایسے کلچرل ایونٹس کے ذریعے نہ صرف مقامی کمیونٹی بلکہ بین الاقوامی سطح پر بھی سندھ کی تاریخ اور ثقافت کو متعارف کروایا جائے گا۔
