نیو کراچی ٹاؤن میں شبِ برات کی آمد کے پیشِ نظر بلدیاتی تیاریوں کے حوالے سے اہم اجلاس

نیو کراچی، 28 جنوری 2026

نیو کراچی ٹاؤن میں شبِ برات کی آمد کے پیشِ نظر بلدیاتی انتظامات کو حتمی شکل دینے کے لیے میونسپل کمشنر منور حسین ملاح کی زیرِ صدارت ایک اہم اجلاس منعقد ہوا۔ اجلاس میں زائرین کی آمد کے پیشِ نظر شہری سہولیات، صفائی ستھرائی، سڑکوں کی استرکاری، قبرستانوں اور اطراف کے علاقوں میں روشنی کے انتظامات پر تفصیلی تبادلہ خیال کیا گیا۔

میٹنگ میں شامل افسران اور محکمے

میٹنگ میں سینئر ایڈمنسٹریٹر ڈائریکٹر شمونہ صدف، بی اینڈ آر ڈیپارٹمنٹ کے جہانزیب خان، فیصل صغیر، ایڈیشنل ڈائریکٹر سینیٹیشن مشتاق خان، باغات کے ڈائریکٹر عظمت علی شاہ، جاوید جمال، ایم اینڈ ڈی ڈیپارٹمنٹ کے XEN شفقت، واجد خان اور عرفان خان سمیت متعلقہ محکموں کے افسران نے شرکت کی۔

میونسپل کمشنر کے ہدایات

"شبِ برات ایک مقدس رات ہے جس میں شہری بڑی تعداد میں قبرستانوں اور مزارات کا رخ کرتے ہیں، اپنے مرحومین کے لیے دعا اور ایصالِ ثواب کرتے ہیں۔ بلدیاتی ادارے کی یہ اولین ذمہ داری ہے کہ عوام کو ایک صاف، محفوظ ماحول فراہم کیا جائے۔ قبرستانوں میں صفائی ستھرائی، روشنی کا مناسب انتظام اور آمد و رفت کے راستوں کی استرکاری کو ہر صورت یقینی بنایا جائے۔"
— میونسپل کمشنر منور حسین ملاح

انہوں نے مزید کہا کہ قبرستانوں کے اطراف اور مرکزی راستوں پر خصوصی توجہ دی جائے، جھاڑیوں کی صفائی، گندگی کے فوری خاتمے اور اسٹریٹ لائٹس کی درستگی کو ترجیحی بنیادوں پر مکمل کیا جائے۔ کسی بھی قسم کی غفلت یا تاخیر برداشت نہیں کی جائے گی۔

میونسپل کمشنر نے افسران کو سختی سے ہدایت کی کہ شبِ برات سے قبل تمام تر انتظامات مکمل کر لیے جائیں تاکہ زائرین کو کسی قسم کی دشواری یا پریشانی کا سامنا نہ کرنا پڑے۔ انہوں نے واضح کیا کہ فیلڈ میں افسران کی موجودگی اور نگرانی لازمی ہوگی اور تمام متعلقہ محکمے باہمی تعاون سے اپنی ذمہ داریاں ادا کریں گے۔