کراچی میں بارش کے پیشِ نظر چیئرمین منگھوپیر ٹاؤن حاجی نواز علی بروہی کا ہنگامی دورہ
رین ایمرجنسی کے تحت نکاسیٔ آب کا عملی جائزہ، عوام میں اعتماد کی فضا قائم
کراچی: شہر میں حالیہ بارش کے پیشِ نظر چیئرمین منگھوپیر ٹاؤن حاجی نواز علی بروہی نے رین ایمرجنسی کے تحت منگھوپیر ٹاؤن کے مختلف علاقوں کا تفصیلی اور ہنگامی دورہ کیا۔ دورے کا بنیادی مقصد بارش کے بعد نکاسیٔ آب کی صورتحال کا عملی جائزہ لینا اور اس امر کو یقینی بنانا تھا کہ کسی بھی علاقے میں بارش کا پانی جمع نہ ہو اور شہریوں کو آمد و رفت میں مشکلات کا سامنا نہ کرنا پڑے۔
چیئرمین منگھوپیر ٹاؤن نے صرف ہدایات دینے پر اکتفا نہیں کیا بلکہ بارش کے دوران خود فیلڈ میں موجود رہتے ہوئے مرکزی شاہراہوں، اندرونی گلیوں، نشیبی علاقوں اور حساس مقامات کا تفصیلی معائنہ کیا۔ جہاں جہاں بارش کا پانی جمع نظر آیا، وہاں حاجی نواز علی بروہی خود پانی میں اتر گئے اور بلدیاتی عملے کے شانہ بشانہ کھڑے ہو کر فوری نکاسیٔ آب کو یقینی بنایا۔
“عوام کو مشکلات میں تنہا نہیں چھوڑا جا سکتا، جب تک پانی نکل نہیں جاتا ہم فیلڈ میں موجود رہیں گے۔”
چیئرمین کی اس عملی موجودگی نے نہ صرف بلدیاتی عملے کے حوصلے بلند کیے بلکہ عوام میں بھی اطمینان اور اعتماد کی فضا قائم کی۔ موقع پر موجود شہریوں نے چیئرمین کو بارش کے پانی میں کھڑے ہو کر کام کرواتے دیکھا تو انہوں نے کھل کر اپنے جذبات کا اظہار کیا۔ شہریوں کا کہنا تھا کہ انہوں نے اپنی زندگی میں ایسا چیئرمین نہیں دیکھا جو ہر مشکل میں خود فیلڈ میں اتر کر عوامی مسائل حل کرتا ہو۔
عوامی پذیرائی پر چیئرمین منگھوپیر ٹاؤن حاجی نواز علی بروہی نے شکریہ ادا کرتے ہوئے کہا:
“یہ عوام کی محبت، دعاؤں اور اعتماد کا نتیجہ ہے۔ منگھوپیر ٹاؤن کے عوام میرا خاندان ہیں، اور خاندان کو مشکل وقت میں تنہا نہیں چھوڑا جاتا۔”
اس موقع پر میونسپل کمشنر منگھوپیر ٹاؤن احمد یار اور متعلقہ فیلڈ اسٹاف بھی چیئرمین کے ہمراہ موجود رہا، جو مشینری، ڈی واٹرنگ پمپس اور افرادی قوت کے ذریعے نکاسیٔ آب کے کاموں میں مصروف رہا۔ چیئرمین نے افسران اور عملے کو واضح ہدایات دیتے ہوئے کہا کہ محکمہ موسمیات کی پیش گوئی کے دوران رین ایمرجنسی مکمل طور پر نافذ رہے گی۔
انہوں نے مزید ہدایت کی کہ جن علاقوں میں ماضی میں پانی جمع ہونے کی شکایات رہی ہیں وہاں خصوصی توجہ دی جائے، تمام نالوں اور لائنوں کو فعال رکھا جائے اور مشینری و عملہ ہمہ وقت الرٹ حالت میں موجود رہے تاکہ عوام کو کسی قسم کی پریشانی کا سامنا نہ ہو۔
چیئرمین منگھوپیر ٹاؤن نے عوام سے بھی اپیل کی کہ شدید بارش کے دوران بلا ضرورت گھروں سے باہر نہ نکلیں، نشیبی علاقوں اور کھلے مین ہولز کے قریب احتیاط برتیں اور کسی بھی ہنگامی صورتحال کی صورت میں فوری طور پر ٹاؤن انتظامیہ کو اطلاع دیں۔
آخر میں حاجی نواز علی بروہی نے اس عزم کا اظہار کیا کہ وہ ذاتی طور پر بارش کے دوران فیلڈ میں موجود رہیں گے، صورتحال کی نگرانی کریں گے اور عوام کے مسائل کو ترجیحی بنیادوں پر حل کر کے منگھوپیر ٹاؤن کو محفوظ، صاف اور بہتر بنانے کے لیے اپنی کوششیں جاری رکھیں گے۔