کراچی / گمبٹ — گمبٹ انسٹی ٹیوٹ آف میڈیکل سائنسز (گمس) کے ڈائریکٹر رحیم بخش بھٹی کے مبینہ پرسنل سیکریٹری عامر کھوڑو کے حوالے سے چونکا دینے والے دعوے سامنے آئے ہیں۔ ذرائع کے مطابق عامر کھوڑو نے گزشتہ دس برسوں کے دوران تقریباً دو ارب روپے مالیت کے اثاثے بنا لیے ہیں۔
ذرائع کا کہنا ہے کہ عامر کھوڑو تقریباً ایک دہائی قبل ایک گیراج میں ہیلپر کے طور پر کام کرتے تھے، تاہم اب وہ اسلام آباد میں ایک پیٹرول پمپ اور قیمتی رہائشی بنگلے کے مبینہ مالک بتائے جاتے ہیں۔
اطلاعات کے مطابق کراچی میں ایک فلیٹ جبکہ گمبٹ کی فلور مل روڈ پر تقریباً تین کروڑ روپے مالیت کا بنگلہ بھی ان کی ملکیت میں شامل ہے۔
"ایک معمولی پس منظر رکھنے والا شخص اتنے کم عرصے میں اربوں روپے کے اثاثے کیسے بنا سکتا ہے؟"
— شہری حلقے
مزید دعویٰ کیا گیا ہے کہ ان کے زیرِ استعمال 2024 ماڈل ریوو سمیت چار لگژری گاڑیاں موجود ہیں، جبکہ خاندان کے افراد کے پاس بھی لاکھوں روپے مالیت کے جدید موبائل فونز ہیں۔
عوامی و سماجی حلقوں نے مطالبہ کیا ہے کہ ان الزامات کی مکمل، غیر جانبدار اور شفاف تحقیقات کی جائیں۔ شہریوں کا کہنا ہے کہ اگر الزامات میں صداقت ہے تو ذمہ داران کے خلاف قانونی کارروائی کی جائے، جبکہ اگر دعوے بے بنیاد ہیں تو متعلقہ حکام وضاحت جاری کریں۔
"قومی احتساب بیورو (نیب) اور اینٹی کرپشن اسٹیبلشمنٹ سندھ فوری طور پر معاملے کا نوٹس لیں۔"
شہریوں نے قومی احتساب بیورو (نیب) اور محکمہ اینٹی کرپشن اسٹیبلشمنٹ سندھ سے مطالبہ کیا ہے کہ وہ اس معاملے کی چھان بین کریں تاکہ حقائق عوام کے سامنے لائے جا سکیں۔
واضح رہے کہ اس خبر میں شامل تمام دعوے ذرائع کے حوالے سے بیان کیے گئے ہیں، جبکہ متعلقہ حکام یا مذکورہ افراد کی جانب سے تاحال کوئی باضابطہ ردعمل سامنے نہیں آیا۔