متحدہ عرب امارات میں سندھ کرکٹ لیگ سیزن تھری اختتام پذیر، کراچی ٹیم چیمپئن قرار
عجمان (اسپورٹس رپورٹر)
متحدہ عرب امارات میں سندھ کرکٹ لیگ کا تیسرا سیزن کامیابی کے ساتھ اختتام پذیر ہوگیا، جہاں فائنل مقابلے میں کراچی کی ٹیم نے شاندار کارکردگی کا مظاہرہ کرتے ہوئے ٹائٹل اپنے نام کرلیا۔
ڈویژن کی بنیاد پر کھیلی جانے والی اس لیگ میں چھ ٹیمیں شامل تھیں جن میں کراچی، حیدرآباد، سکھر، نوابشاہ، لاڑکانہ اور میرپورخاص شامل تھے۔ تمام ٹیموں نے دو، دو راؤنڈز کھیلے جس کے بعد سرفہرست ٹیموں نے سیمی فائنل میں جگہ بنائی، جبکہ ابتدائی مرحلے میں سکھر اور حیدرآباد کی ٹیمیں کوالیفائی نہ کرسکیں۔
اس مرتبہ دو روزہ ٹورنامنٹ عجمان میں منعقد کیا گیا۔ ٹورنامنٹ کے مہمانِ خصوصی سینئر سیاستدان سہیل انور سیال اور ایاز لطیف پلیجو تھے، جنہوں نے کھلاڑیوں سے ملاقات کی اور باصلاحیت کرکٹرز کو آگے بڑھانے کے لیے پاکستان کرکٹ بورڈ سے سفارش کی یقین دہانی بھی کرائی۔
کراچی ٹیم نے فائنل میں شاندار کھیل پیش کرتے ہوئے سندھ کرکٹ لیگ سیزن تھری کی ٹرافی اپنے نام کرلی۔
سیمی فائنلز میں نوابشاہ نے لاڑکانہ کو جبکہ کراچی نے میرپورخاص کو شکست دے کر فائنل میں رسائی حاصل کی۔ فائنل مقابلے میں کراچی کی ٹیم نے بہترین کھیل پیش کرتے ہوئے ٹائٹل اپنے نام کیا۔
اختتامی تقریب میں میزبانوں کی جانب سے معزز مہمانوں کو سندھ کی ثقافتی سوغات اجرک اور اعزازی شیلڈز پیش کی گئیں۔ مہمانِ خصوصی نے فاتح کراچی ٹیم کو ٹرافی کے ساتھ 5 ہزار درہم نقد انعام دیا جبکہ رنر اپ ٹیم کو ٹرافی اور 2 ہزار 500 درہم نقد دیے گئے۔
ٹورنامنٹ کو دیکھنے اور کھلاڑیوں کی حوصلہ افزائی کے لیے لیگ کے برانڈ ایمبیسیڈر علی گل ملاح ہر سال پاکستان سے متحدہ عرب امارات پہنچتے ہیں۔ خصوصی مہمانوں میں لندن سے شفیق شاہانی اور مجیب جم بھٹو بھی شریک ہوئے، جبکہ متحدہ عرب امارات کے مختلف علاقوں سے سندھ سے تعلق رکھنے والے شائقین کی بڑی تعداد موجود تھی۔
تصویری کیپشن: عجمان میں سندھ کرکٹ لیگ سیزن تھری کی اختتامی تقریب اور ٹرافی کی رونمائی۔