دبئی، متحدہ عرب امارات — آئی سی سی مینز ٹی ٹوئنٹی ورلڈ کپ کے سب سے بڑے مقابلے پاک بھارت ٹاکرے سے قبل انگلینڈ کے مایہ ناز آل راؤنڈر معین علی نے اہم پیشگوئیاں کرتے ہوئے بھارتی فاسٹ بولر جسپریت بمراہ اور اسپنر کلدیپ یادیو کی کھل کر حمایت کی ہے۔ یہ خیالات انہوں نے "مسٹر کرکٹ یو اے ای" پوڈکاسٹ کے دوسرے خصوصی ایپی سوڈ میں گفتگو کرتے ہوئے ظاہر کیے۔
پوڈکاسٹ کے میزبان انیس ساجن کے ساتھ تفصیلی گفتگو میں معین علی نے ٹیم کمبی نیشن، وکٹ کی صورتحال اور ممکنہ میچ اپس پر روشنی ڈالی، جبکہ پاک بھارت میچ کو دنیا کے سب سے بڑے کرکٹ مقابلوں میں سے ایک قرار دیا۔
"عام طور پر پریما داسا کی وکٹ اسپنرز کو مدد دیتی ہے، لیکن میرا خیال ہے کہ اس میچ کے لیے اچھی وکٹ تیار کی جائے گی تاکہ دونوں ٹیمیں اپنی فطری کرکٹ کھیل سکیں۔"
بھارتی ٹیم کے حوالے سے گفتگو کرتے ہوئے معین علی نے کہا کہ سوریہ کمار یادیو وہ بلے باز ہیں جن سے پاکستان کو سب سے زیادہ محتاط رہنا ہوگا کیونکہ وہ چند اوورز میں میچ کا رخ بدل سکتے ہیں۔
"بولنگ کے اعتبار سے جسپریت بمراہ اور کلدیپ یادیو بھارت کے اصل میچ ونرز ہیں۔ کلدیپ کسی بھی کنڈیشن میں میچ جتوا سکتے ہیں۔"
پاکستانی ٹیم کے کمبی نیشن پر رائے دیتے ہوئے معین علی نے ایک جرات مندانہ تجویز پیش کی۔
"میرا خیال ہے کہ پاکستان کو فخر زمان کو شامل کرنا چاہیے۔ میں سمجھتا ہوں کہ اس میچ کے لیے بابر اعظم کی جگہ فخر زمان کو موقع دینا پاکستان کے لیے فائدہ مند ہو سکتا ہے۔"
انہوں نے مزید کہا کہ شاہین آفریدی اور خواجہ نفے کو بھی ٹیم میں شامل کیا جانا چاہیے، جبکہ وکٹ کیپنگ پوزیشن پر بھی تبدیلی ٹیم کا توازن بہتر بنا سکتی ہے۔
پاکستانی بولرز کے حوالے سے معین علی نے کہا کہ ابرار احمد بھارتی بیٹنگ لائن کے لیے خطرناک ثابت ہو سکتے ہیں، جبکہ عثمان طارق بھی اپنی منفرد بولنگ کے باعث بھارت کے لیے چیلنج بن سکتے ہیں۔
"عام طور پر بھارت پاکستان کے خلاف فیورٹ ہوتا ہے، لیکن اس بار مجھے لگتا ہے کہ پاکستان جیت سکتا ہے۔"
ٹورنامنٹ کی پیشگوئی کرتے ہوئے معین علی نے بھارت، جنوبی افریقہ، انگلینڈ اور پاکستان کو سیمی فائنلسٹ قرار دیا، جبکہ ممکنہ فائنل پاک بھارت ہونے کی صورت میں فاتح کی پیشگوئی بعد میں کرنے کا عندیہ دیا۔
کرکٹ شائقین کے درمیان اس انٹرویو نے خاصی ہلچل مچا دی ہے اور خاص طور پر بمراہ اور کلدیپ یادیو کے حوالے سے معین علی کی حمایت موضوع بحث بنی ہوئی ہے۔