اسلام آباد | بیان
مرکزی ترجمان پاکستان پیپلز پارٹی پارلیمنٹرینز شازیہ مری نے انسدادِ پولیو مہم کی اہمیت پر زور دیتے ہوئے کہا ہے کہ پولیو اب بھی پاکستان میں ایک سنگین عوامی صحت کا مسئلہ ہے، جس کے خاتمے کے لیے قومی سطح پر مستقل توجہ، مضبوط حکمتِ عملی اور اجتماعی عزم ناگزیر ہے۔
اپنے ایک بیان میں شازیہ مری کا کہنا تھا کہ بچوں کو پولیو کے قطرے نہ پلانا قومی انسدادِ پولیو مہم کو کمزور کرتا ہے اور معصوم بچوں کی زندگیوں کو شدید خطرے سے دوچار کرتا ہے۔
انہوں نے والدین پر زور دیا کہ وہ پولیو ٹیموں سے بھرپور تعاون کریں اور ہر مہم کے دوران اپنے بچوں کو لازمی طور پر پولیو ویکسین پلائیں تاکہ اس موذی مرض کا مکمل خاتمہ ممکن بنایا جا سکے۔
“بچوں کو پولیو کے قطرے نہ پلانا ان کی زندگیوں کو شدید خطرے میں ڈالنے کے مترادف ہے۔”
— شازیہ مری
مرکزی ترجمان نے کہا کہ پولیو جیسے خطرناک مرض کا خاتمہ صرف اسی صورت ممکن ہے جب حکومت، صحت کے ادارے، والدین اور معاشرہ مل کر اپنی ذمہ داری ادا کریں۔
انہوں نے انسدادِ پولیو مہم میں خدمات انجام دینے والے ورکرز کی کاوشوں کو سراہتے ہوئے کہا کہ پولیو ورکرز کی محنت، لگن اور قربانیاں قابلِ تحسین ہیں جو سخت حالات کے باوجود قومی فریضہ سرانجام دے رہے ہیں۔
“پاکستان پیپلز پارٹی پولیو فری پاکستان کے ہدف کے حصول کے لیے ہر سطح پر تعاون جاری رکھے گی۔”
— شازیہ مری
آخر میں شازیہ مری نے اس عزم کا اظہار کیا کہ پاکستان پیپلز پارٹی ایک صحت مند اور محفوظ مستقبل کے لیے پولیو کے مکمل خاتمے تک اپنی جدوجہد جاری رکھے گی۔