کراچی | پریس ریلیز
چیئرمین ماڑی پور ٹاؤن جناب ہمایوں محمد خان کی ہدایت پر حج برائے سال 2026 کے لیے ملازمین کے ناموں کی قرعہ اندازی ایک منظم اور شفاف تقریب کے ذریعے منعقد کی گئی۔
تقریب میں چیئرمین ماڑی پور ٹاؤن ہمایوں محمد خان، وائس چیئرمین آصف کوثر، میونسپل کمشنر جاوید قمر، افسران اور ملازمین نے بھرپور شرکت کی۔
قرعہ اندازی کے دوران چار خوش نصیب ملازمین کے نام حج کے لیے منتخب ہوئے، جو ٹی ایم سی ماڑی پور کی جانب سے حج 2026 میں حجِ بیت اللہ کی سعادت حاصل کریں گے۔
“ملازمین کو حج کے مقدس سفر کے لیے سہولت فراہم کرنا قابلِ ستائش اقدام ہے۔”
— حاجی عبدالکریم، صدر پیپلز یونائٹڈ ورکرز یونین
اس موقع پر چیئرمین ماڑی پور ٹاؤن ہمایوں محمد خان نے اظہارِ خیال کرتے ہوئے کہا کہ حج دنیا بھر کے مسلمانوں کا سب سے بڑا روحانی اور اسلامی مرکز ہے، جہاں عبادت اور زیارت ہر مسلمان کی سب سے بڑی خواہش ہوتی ہے۔
چیئرمین ماڑی پور ٹاؤن، وائس چیئرمین آصف کوثر، میونسپل کمشنر جاوید قمر اور اراکینِ کونسل نے حج کے لیے منتخب ہونے والے تمام ملازمین کو مبارکباد پیش کی۔
میونسپل کمشنر جاوید قمر نے کہا کہ بیت اللہ اور روضۂ رسولؐ تمام اہلِ اسلام کے لیے سب سے مقدس مقامات ہیں، جن کی زیارت ہر مسلمان کی دلی تمنا ہوتی ہے۔
“اس مہنگائی کے دور میں حج کا تصور بھی ممکن نہ تھا، یہ ہمارے لیے ایک عظیم نعمت ہے۔”
— منتخب ہونے والے ملازمین
قرعہ اندازی میں منتخب ہونے والے خوش نصیب ملازمین نے چیئرمین ہمایوں محمد خان اور میونسپل کمشنر جاوید قمر کا تہہ دل سے شکریہ ادا کرتے ہوئے کہا کہ اس اقدام نے ان کے خواب کو حقیقت میں بدل دیا۔