کراچی آرٹس کونسل میں عوامی تھیٹر فیسٹیول، سندھی ڈرامہ “دل جی دنیا” نے شائقین کے دل جیت لیے
کراچی (شوبز نیوز)
آرٹس کونسل آف پاکستان کراچی میں جاری عوامی تھیٹر فیسٹیول 2026 کے سلسلے میں سندھی مزاحیہ و اصلاحی اسٹیج ڈرامہ “دل جی دنیا” شاندار انداز میں پیش کیا گیا۔ ڈرامے کے خالق معروف ادیب رشید صابر جبکہ ہدایتکاری کے فرائض رضوان صابر نے انجام دیے۔
ڈرامہ اپنی منفرد کہانی، برجستہ مکالموں اور مضبوط معاشرتی پیغام کے باعث شائقین کی توجہ کا مرکز بنا رہا۔ مزاح اور سنجیدہ موضوعات کے حسین امتزاج نے حاضرین کو بھرپور تفریح فراہم کی اور ساتھ ہی معاشرتی رویّوں پر غور و فکر کا پیغام دیا۔ ہال تالیوں سے گونجتا رہا اور فنکاروں نے شاندار داد وصول کی۔
ڈرامہ “دل جی دنیا” نے تفریح کے ساتھ معاشرتی شعور اجاگر کرنے کا پیغام بھی دیا۔
نمایاں پرفارمنس سپنا غزل کی رہی جنہوں نے اپنی متاثرکن اداکاری سے محفل کو چار چاند لگا دیے، جبکہ مہمان اداکار آدم راٹھور کی شرکت نے پروگرام کی دلکشی میں اضافہ کیا۔ دیگر فنکاروں میں نسرین ناز، جاوید ٹاکانی، اے جی خان، رضوان مرزا، اسماء علی، وقار لطیف منو، طارق گڈو، رضیہ شیخ اور گل محمد لاشاری شامل تھے۔
اس موقع پر ہدایتکار رضوان صابر نے سید احمد شاہ کو خراجِ تحسین پیش کرتے ہوئے کہا کہ ان کی قیادت میں آرٹس کونسل آف پاکستان فنونِ لطیفہ کا حقیقی مرکز بن چکی ہے۔ ان کے وژن اور سرپرستی کے باعث عوامی تھیٹر فیسٹیول جیسے پروگرام مقامی زبانوں اور ثقافت کے فروغ میں اہم کردار ادا کر رہے ہیں۔
عوامی تھیٹر فیسٹیول 2026 میں پیش کیا جانے والا ڈرامہ “دل جی دنیا” نہ صرف تفریح کا بہترین ذریعہ ثابت ہوا بلکہ سندھی تھیٹر کی روایت کو بھی بھرپور انداز میں اجاگر کرنے میں کامیاب رہا۔ بڑی تعداد میں شائقین کی شرکت نے اس شام کو یادگار بنا دیا۔
تصویری کیپشن: آرٹس کونسل کراچی میں عوامی تھیٹر فیسٹیول کے دوران پیش کیا گیا اسٹیج ڈرامہ “دل جی دنیا”۔