کراچی (اسٹاف رپورٹر)
الخدمت فاؤنڈیشن سندھ کے تحت 5 فروری کو یومِ یکجہتی کشمیر بھرپور انداز سے منایا گیا۔ اس موقع پر کشمیری عوام سے اظہارِ یکجہتی کے لیے مختلف تقاریب اور آگاہی سرگرمیوں کا انعقاد کیا گیا۔
کشمیر ڈے کی مناسبت سے الخدمت آرفن کیئر کے تمام کلسٹرز میں زیرِ کفالت بچوں کے لیے خصوصی پروگرامز منعقد کیے گئے، جن میں کشمیری عوام کی جدوجہد، قربانیوں اور حقِ خودارادیت پر روشنی ڈالی گئی۔ بچوں نے تقاریر، ملی نغموں اور یکجہتی پیغامات کے ذریعے کشمیری عوام کے ساتھ اپنی وابستگی کا اظہار کیا۔
اسی طرح الخدمت والنٹیئر مینجمنٹ کے تحت دستخطی مہم اور آگاہی واک کا بھی اہتمام کیا گیا، جس میں الخدمت کے ضلعی ذمہ داران، والنٹیئرز اور مختلف سماجی شخصیات نے بھرپور شرکت کی۔ شرکاء نے کشمیری عوام کے حق میں بینرز اور پلے کارڈز اٹھا رکھے تھے جبکہ بڑی تعداد میں لوگوں نے بینرز پر دستخط بھی کیے۔
“کشمیر پاکستان کی شہ رگ ہے، کشمیری عوام گزشتہ کئی دہائیوں سے بدترین ظلم، ریاستی دہشت گردی اور انسانی حقوق کی سنگین خلاف ورزیوں کا سامنا کر رہے ہیں۔”
مقررین نے کہا کہ معصوم کشمیری مرد، خواتین اور بچے آئے روز بھارتی افواج کے مظالم کا نشانہ بن رہے ہیں، جبکہ عالمی برادری کی خاموشی نہایت افسوسناک اور قابلِ مذمت ہے۔
انہوں نے اس بات پر زور دیا کہ مسئلہ کشمیر ایک بین الاقوامی تسلیم شدہ تنازعہ ہے، جسے اقوامِ متحدہ کی منظور شدہ قراردادوں کے مطابق کشمیری عوام کو حقِ خودارادیت دے کر حل کیا جانا چاہیے۔
مقررین نے عالمی اداروں اور انسانی حقوق کی تنظیموں سے مطالبہ کیا کہ وہ مقبوضہ کشمیر میں ماورائے عدالت قتل، جبری گمشدگیوں، کرفیو اور دیگر انسانی حقوق کی خلاف ورزیوں کا فوری نوٹس لیں۔
تصویری کیپشن: الخدمت فاؤنڈیشن سندھ کے تحت یومِ یکجہتی کشمیر کی مناسبت سے ہونے والی مختلف سرگرمیاں۔